SALLOM

قال يعني>>>غزة تغرق في الظلام!!!!

2010-08-14T22:09:00.006+02:00

معاناة الكهربا في غزة معاناة جدا كبيرة،،طبعا الكل بيشوف وبيسمع (غزة تغرق في الظلام)بس طبعا المعاناة على الطبيعية من أروع ما يمكن!!!!

الموضوع جدا متشعب

*بس اللي كل بني ادم في غزة بيعرفو ،انو محطة الكهربا عندها وقود بيكفي يشغلها تمام التمام،او على الاقل يشغلها طول اليوم ويقطعوها 4 ساعات مثلا!!

بس طبعا ولأسباب سياسية أنا عن نفسي ماليش دخل فيها الناس كلهم شايفين انو احنا بنغرق في الظلام،مع انو مفروض مع هالمعابر اللي فتحولنا اياها والبضاعة اللي من الانفاق نكون بنغرق في العز !

*أمي زي كل ستات البيوت دايما هاكلة هم الدنيا كلها مع هالكهرب،

بدي أغسل عشان الكهربا،بدي اعصر الكهربا،بدي اطبخ الكهربا،حياتنا كلها على الكهربا اساسا

*يومي العادي بيبدا طبيعي جدا،،بصحى من النوم بكتشف انو ما فيه كهربا كالعادة،،بكون مخططة أكوي قميص ولا بنطلون ما بلاقي الكهربا والحمد لله،بلبسهم بدون كوي!!!اساسا طبيعي تلاقي كل البني ادمين اللي بغزة مجعلكين عادي جدا الموضوع صااار

*بطلع على الجامعة ،بالفترة اللي بكون فيها بالجامعة بتيجي الكهربا كام ساعة بيكون الناس كلهم بيحاولوا يفرحوا شوية،بشتغلو شغلهم اللي على الكهربا،وبيشغلو المراوح والمكيفات(لو كان فيه كهربا قوية تشغلهم اساسا)

وبيعيشوا حياة الرفاهية مفروض!وطبعا بيكونو حطو كام قزازة مية بالتلاجة وبتكون هيك الحالة عااااال العال،مية باردة ومروحة وتلفزيون(أنا ملـــــــــك العالم يا جماعة)

*برجع بعد معاناة مضنية مع أنغام الماتورات(الجينيريتور بس بالغزاوي مطوور)وبيكون عندي طرش جزئي وبيصير كلي أول ما بوصل البيت

بلاقي ما فيش كهربا والعالم كلهم مشغلين الماتورات وطبعا التلوث السمعي واصل لمداه،،وساعتها أيا بيت بتدخلو رح تلاقيهم بيصرخو مش بيحكو لانهم اساسا مش سامعين بعض

بعد المغرب ما يأدن بيصير الموضوع كرب عل اااخر،بيصير مستحيل تقدر تسمع صوت غير اصوات الماتورات

*الموضوع برمضان أسوأ بمرااااحل

من حلاوة الروح احنا بنتسحر عل عتمة وبنفطر عل عمتة وحياتنا كلها مقضيينها عتمة بعتمة،،

بس اللي بيقهرك بتلاقي فيه مناطق عازينها جدا وجايبين عليها الكهربا طول اليوم ومناطق تانية بتلاقيها خير اللهم اجعلو خير سوااااد

فبتكتشف انو بالمنطقة الفلانية ساكن القائد الفلاني فطبعا كلنا فداء للقائد ،،الشعب يفطس من الحر والقائد يكون قاعد مبسوط بالتكييف!!هيك الديموقراطية يا اما بلاش!

*ممكن تعرف جدول قطعة الكهربا عند كل اصحابك وصاحباتك من الفيس بوك،بمجرد انك تفوت على الفيس بوك مستحيل تلاقي حدا مش جايب سيرة الكهربا ،ال status تبعت كل البني ادمين،يا اما الله يخرب بيتهم قطعو الكهربا،أو الله يعمر بيتهم اجت الكهربا

وطبعا كلُ يغني على ليلاه،اللي بيشتم ومتدايق لانها قطعت عليه،واللي بيكون حب العالم كلو بمجرد انهم جابولو الكهربا،الله بيعيين

*مبيعات الصيدليات زادت الفترة اللي فاتت(انا ما بحسدش اللهم زييييدهم) من البانادول بشكل مش طبيعي،كل ما تروح على حدا بيقلك أنا مصدع ،انا راسي شوية وينفجر ،انا وانا وانا،والسبب طبعا الأنغام الموسيقية للماتورات.

بس بتعرفو،بيني وبينكو الكهربا هاي نظمت حياتنا بشكل مش طبيعي،لدرجة انو لما بيجيبلونا اياها ساعة زيادة بنقدرش نستفيد منها،لانو طول الوقت واحنا بنفكر امتا رح تقطع امتا رح تقطع،يعني قد ما لقطع الكهربا مساوئ بس الها مميزات:

*صار موضوع انك تصحى بدري وتنام بدري مفروغ منو،لازم تنام بدري لانو ما فيش اشي تعملو طالما انو الكهربا قاطعة،ولا انترنت ولا تلفزيون،ولا حتى بني ادمين تقعد معاهم ،لانك ببساطة مش رح تشوفهم او تسمعهم لو ما طفيت الموتور،فالناس بتتضطر تطفي الماتورات بدريعشانها بتدايق ناس تانية،فكل الناس بعد هالتلوث السمعي لمدة يوم كامل ،احسن اشي بيصير الهم انهم بينامو بدري،فبتلاقي الناس نامو على ال 11 اكتر حاجة،وطبيعي لانك نمت بدري فانتا رح تصحى بدري،وهادا كلو ممتاز جدا لصحتك،،وكمان بتصحى بتصلي الفجر حاضر!!

*قطعة الكهربا جمعت الأهل ،،بتلاقيهم متكومين حوالين الشمعة ومبسوطين على حالهم كتير،،وبيخانقو ببعض وبيتقاتلو(على اساس انها جمعة اهل يعني)

*قطعة الكهربا زودت المستوى الاقتصادي لبعض الناس،من بيع الماتورات والبنزين،وهادا كويس يعني،احسن ما الشعب كلو متنيل بستين نيلة ،خلي ناس تفرح عل أقل(والله ما بحسدهم بالعكس مبسوطة عشانهم!!)

*قطعة الكهربا زودت سفن كسر الحصار اللي ناوية تيجي على غزة وبالتالي المواد التموينية ،اللي مفروض انها توصل للشعب الغلبان،وبالتالي احنا معطيين صورة للعالم الخارجي انو احنا (نغرق في ظلام دامس)وبالتالي يا ويلي يا حرام احنا مساكين فهما بيتعاطفو معانا

بكل الأحوال الكهربا هاي موضوع ما بيخلص لو حكينا عليه،،وكل واحد فينا لو كان عايش بغزة طبعا!رح يعاني المعاناة،اللي هلقيت بدت تزيد لانو كل يوم الجو بيصير حر أكتر،والواحد قرب يفطس بس على رأي هالواحد(لازم ما نتزمرش(نتذمر) علشان ناخد ثواب أكتر>>د.تيما)

وأول ما يصير ايا حاجة بالمروحة أو المكيف أو ايا حاجة(هادا البني ادم وغيرو كتير بيبدو يتأفّفوا على اساس ثواب يعني!!!)

بالأول والأخير،،بعيييييين الله

إمتحانااااااات،،إلححححححق أو ما تلحق

2010-06-17T15:23:00.003+03:00

مش طبيعي قديش أيام الامتحانات وضع البني ادم بكون صعب،بس بدو يلاقيلو حجة ويبطل يدرس.

وضعي أنا مشابه لكتير ناس بيمروا بهالفترة بس الميزة الوحيدة إني ما بدرس من الأساس(يا فرحتهاااا).اسمها حالة اكتئاب حالة ارهاب حالة كباب أنا نفسي مش عارفة شو أسميها

بس أزبط اشي حالة بلادة بني ادم عارف انو اختباراتو بتبدا الاسبوع الجاي ومطنشها ومتبع مبدأ مع نفسك وغدا ألقاك(الكل عارفو طبعا هادا المبدأ).

بصحى كل يوم الصبح أخانق بأخواتي بما إنهم فاضيين وما وراهم مدارس

بعمل تسريحة الشعر المعتمدة لهذه السنة (وشكلها مش رح تكون آخر سنة)طبعا بتشبه الكرتون الياباني كعكتين عل جنبين عاملين زي الرادار

بمسك الابتوب وبفتح الاشي الي لازم ادرسو(ما تعبت حالي وصورت ورق فجبت كل دراستي ملفات ‏pdf‎‏)>>>فالحة خاالص ماشالله عليا

‏ وببدا أحاول أدرس وبتستمر محاولاتي من الساعة 6 الصبح ل 12 بالليل وبكون أنجزت بإذن الله 5 صفحات وطبعا بالنسبة للكسل إلي عايشاه بكون ممتاز

طبعا باخد مليون بريك(يا خوفي يكون يومي كلو بريك ودراستي تطلع الشيئ الدخيل!)

البريك طبعا بحضر فيه مباريات كأس العالم الي بتضل ل 11ونص بالليل غير طبعا النوم الي زهق مني،متى ما احط راسي عل مخدة بنااام تقول ما وراي ولا شغلة ونفسيتي مرتااحة ماشالله عل ااااخر.

و24ساعة عايشة عل فيس بوك وبحط بالجروب تبعي نتايج المباريات(نشيطة نشيطة مش أي كلام)

وهادا ملخص اليوم تبعي إلي مليان نجاح وجد واجتهاد،،،دعاوتكم معي يا جماعة

تغيرات جذرية!!

2010-04-11T14:10:00.007+03:00

التغييرات اللي بتصير للانسان طول عمرو كتيرة جدا،وبتصير لأسباب كتيرة وعلشان احداث بتصير للانسان،ممكن تكون بسبب انو سمع اغنية حركتلو مشاعرو وزكرتو بأشياء كان نسيها،وممكن بسبب كتاب قرأه وغيرلو كل افكارو ومعتقداتو،،

كتير الأشياء اللي غيرتلي حياتي وانا بشوفها للأحسن انشالله،حاسة حالي وصلت مرحلة بقدر فيها احكم على الناس واقدر اتحكم بمشاعري وعصبيتي(بعد جهد جهيد ،الله يمسيك بالخير يللي سامع ههه)عرفت بعد سنتين بس بالجامعة مين الصديقات الكويسين ومين الصاحبات السكة اللي كدا وكدا

كل انسان بتيجيه فترات انو يعقل ويشوف الدنيا بمنظور تاني،ولكن هادي الفترات بتيجي بدري كتير لناس الله كارمهم بنعمة العقل الكبير(مش شايفة حالي خااااالص،انا مش منهم عفكرة هههه)وناس لسا بدهم وقت طويل علشان يعرفو يستفيدو من الاحداث اللي بتصير بحياتهم.

من أحداث حياتي اللي شايفاها عملت تغيير جذري بحياتي هيا:

1-القراءة

قراية كتب مفيدة والها هدف،انا الحمد لله ،الله اكرمني بأم حببتني في القراية بتزكر من اول ما انولدت لهلقيت وانا بشوف كتب وروايات عالمية راقية بالبيت،كنت اقرا كل اشي بتيجي عيني عليه،بعدين صارت تشجعني وتاخدني على مكتبات واقرا لحد ما غصت خالص بهادا العالم الرائع،من 4 سنين فاتو صرت اقرا اشياء كنت اشوفها غريبة علي لحد ما صارت جزء مني،

*عشقت أحلام مستغانمي ورواياتها فترة كبيرة،حبيت طريقتها بالكتابة،اختيارها للالفاظ،الاحداث المتشابكة اللي بتاخدك لعالم تاني وانتا بتقرا،بتوسع مدارك تفكيرك،واخر اشي قرأتو الها كان الكتاب الأخير(نسيان.com) وكان جدا رائع رابط الكتاب

*رواية لحالها حركت كل حياتي اللي هيا مرتفعات ويذرينج(Wuthering Heights)،رائعة اميلي برونتي،قرأتها يمكن وانا بعمر 15 سنة وكل ما اجي اقرأها كل مرة كنت اكتشف حلاوتها وقديش هيا رواية رائعة بنصح الكل انو يقرأها،رابط الرواية

فيه كتير كتب بنصح الكل انو يقراها زي رواية سيد الذباب،ديفيد كوبرفيلد،هادول كلهم انا قريتهم بفترة المراهقة (يعني انا مش كبيرة خالص هههه الله العليم ما اكون طلعت منها :P)وكانو جدا رائعين

*مكتبتي وانا صغيرة بتضم كتب رائعة بنصح كل الاباء والامهات انو يشجعو اولادهم على قرائتها منها،مغامرات توم سوير(عملوها مسلسل كرتون اسمو مغامرات عصام هههه)،روبنسون كروزو،تمردعلى السفينة باونتي،سلسلة فلاش وسماش والرجل المستحيل هههه،طبعا سلسلة روايات هاري بوتر اروع ما في الموضوع عشقتهم ولسا بعشقهم !!.وأي مساعدة بخصوص كتب الاطفال انا جاهزة(احم احم)وايا حدا بدو يستعير من عندي كتاب لابنو او بنتو فانا بحب اقلو انو الكتاب بشيكل (اهلا وسهلا بالجميع ههههه بمزح طبعا).

*عشقي الحالي اللي من سنتين متعلقة بقراية مؤلفاتو(والله يسعدو اللي زكرني فيه تاني)جبران خليل جبران،واعمالو الخالدة الرائعة،مش بس بتوسع الخيالات،بس بتخلي البني ادم يستوعب كتير اشياء بتصير حواليه وبتخليه يفكر في روعة الحياة وجمالها ،جبران فنان بالوصف وجدا رائعة كتبو وأعمالو،من الروائع اللي عجبتني دمعة وابتسامة،العواصف،طبعا ورائعتو النبي

2-الموسيقا والأغاني

قليل جدا اللي الله بيكرمهم بأذن موسيقية زي ما بيقولو،وقلال جدا جدا الناس الذواقة اللي ما بتسمع الفن الهابط ،انا عن نفسي بحب اسمع كل اشي،كل انواع الاغاني ولا أنكر انو احيانا كتير بتعجبني الاغاني اللي بيسموها(هابطة)،بس اجتني فترة بحياتي مش بعيدة كتير متعلقة بسماع الموسيقا اللي ما بيخالطها ايا كلمات،هادي الموسيقا هيا اللي عجيبة جدا،بتحس حالك وانتا مركز وبتسمعها بعالم تاني خالص خالص،قديش هيا رائعة

*من الموسيقا اللي جدا رائعة هيا موسيقا الفنان المبدع عمر خيرت،اللي عمل موسيقا مسلسل ضمير أبلة حكمت ،الو كام مقطوعة موسيقية من أروع ما يكون منها الحب أيضا يموت،ودااااااااع(قمة بالروعة)،الأيام

*من أروع الموسيقيين كمان هوا تشايكوفسكي مبدع موسيقا بحيرة البجع،

كمان فيه موزارت من اعظم اعمالو الفلوت السحري

عنا بيتهوفن واكيد الكل بيسمع فيه عندو تسع سيمفونيات كل واحدة اروع من التانية

بسمع صرت جديد لموسيقار يوناني اسمو ياني(الله يسعدك يا سوسو)واحدة صاحبتي عرفتني على موسيقاه الرائعة

ما بدي انسى حق الاغاني،الاغاني جدا رائعة كمان ،، فيه اغاني هادفة،يعني بتحب تسمعها لانها بتخليك تفكر بحالتك ووضعك وتحسينو للأفضل منها اغاني جديدة عجبتني كتير اغنية تامر حسني أنا مش عارف اتغير،واغنية لاحمد سعد اسمها سألت نفسي كتير (من فيلم الشبح)

موجة من الصفاء الذهني بتصير معاك بمجرد انك تسمع صوت جاهدة وهبي!!أروع من هيك في حياتك ما رح تسمع بنصح الجميع انو يسمعو الها!

وفيه كتير كتير أغاني قمة بالروعة،بس بعيد عن كل الاغاني الحديثة انا عاشقة جدا لنجاة الصغيرة وشادية ووردة وام كلثوم وفيروز وصباح وميادة الحناوي،وما الي غنى عن عبد الحليم وسامي كلارك،ومحمد جمال ووديع الصافي ونصري شمس الدين

تاريخنا العربي فيه من الاغاني كم هائل وكلهم اغاني قمة في الروعة وبتعبر فعلا عن تاريخنا الاصيل

من المطربين الجداد اللي بحترمهم جدا جدا،فضل شاكر،ووائل كفوري،أصالة،يارا،غادة رجب،محمد عبدو!!

3-الاصدقاء والناس،

اكيد كل بني ادم فينا ما كان بعمرو بيقدر يكتشف قديش الناس اللي حواليه كويسين وطيبين ومحترمين ،والاكتر من هيك انو مثقفين وبيفهمو الا ازا اختلط فيهم،على مدى عمر الانسان اكيد بيشوف كتير ناس وبيتعرف على كتير ناس،وفيه ناس كتير بتأثر فيه طباعهم وتصرفاتهم سواء بالسلب أو الايجاب،

لما رحت الجامعة كنت ماخدة صورة مش منيحة خالص عن البنات بشكل عام،وكنت معممة الصورة على كل خلق الله،مضت اول سنة وما حسيت بتغيير،وتاني سنة ولا حياة لمن تنادي،وهيني بتالت سنة اكتشفت شخصيات جدا رائعة من دكاترة وطالبات بيحبو يعرفو،الهم شغف للقراية والاطلاع ،كنت خايفة ما الاقي حدا بيحب يقرا كتاب خارج منهجو الدراسة بس الحمد لله طلع لسا فيه أمل!

*فيه بنت كتير كتير أثرت فيي السنة هادي أنا ما كنت ماخدة عنها ايا انطباع لانها كانت اكبر مني بسنة،بس اندهشت لما لقيت معها كل اسبوع كتاب،بتقراه وبتحللو ومعاها كمان قلم!!!تغيرت فكرتي الها كليا،حبيتها اكتر،تأملت في هالدنيا اكتر،عنجد طلع فيه ناس هيك!!(حبيبتي فوفو )

*انبسطت من الدنيا اكتر واكتر لما لقيت فيه شباب زي الورد،لسا بيفكرو شو يعملو بالواقع المزري الي احنا عايشين فيه بغزة،لسا عندهم أمل وطموح،لسا بيفكرو بمنطق انو غزة عملتلنا كتير واحنا لازم نعمللها!!بتشوف هادول الشباب بكتير اماكن بس ما بتنتبهلهم الا لما تحكي وتختلط معهم،وبتشوفهم بكتير مؤسسات للعمل الشبابي،بتلاقي ناس فعلا بتحب الحياة برغم كل الواقع اللي هيا عايشة فيه،بحييهم كلهم

وفيه كمان شباب كتار بتلاقيهم بينتقدو كل اشي حواليهم(زيي هيك)برضو بحييهم(الله يمسيك بالخير يا ابو الجوج وإم الجوج طبعا ههههه)

4-تجاربي الفاشلة

كل بني ادم بيفشل والحمد لله(الاعتراف بالحق فضيلة)بس اللي شاطر هوا اللي مفروض يتعلم من فشلو وياخد بعضو كدا من الحالة الكئيبة اللي عايشها ويروح لمكان تاني ،ايا مكان بدو اياه المهم يطلع من حالة الفشل،

كتير عشت تجارب فاشلة بحياتي،سواء على المستوى الدراسي،الاجتماعي،وغيرو :P:Pههههه

بس طبعا مع كل تجربة بعيشها بنتقل لحالة البلادة فترة من الزمن،والتناحة فترة اخرى،بعدين الله بيفرجها عليا وبينتعني منها بالسلامة وبقول لحالي انا شو هالعيشة الي عايشاها،لازم اغير من حالي،وبحاول شوية شوية اقلب عل وش التاني(اللي انتو شايفينو ههههه)

بضحك كتير وبزعل كتير وبعيط كتير بس بالاخر بتعلم والحمد لله،الله خلقنا بهادي الدنيا علشان نتعلم،وادينا بنحاول نستفيد من تجاربنا الفاشلة والله كريم ومعو معو بيصير!!

5-إبراهيم الفقي

ااه هوا هادا تبع التنمية البشرية والبرمجة اللغوية العصبية،بني ادم قمة في الروعة ،بيعطي محاضرات وبيكتب كتب مضمونها بشكل عام عن كيفية ارتقاء الانسان بنفسو والتغلب على مخاوفو،فيه الو كتب كتير منها،،للي حابب يتطلع عليها،وهي فيديو الو عل يوتيوب للي حابب يشوفو

وبالاخر بنقول انو الشكوى لله مش للبشر،والواحد بكل الاحوال رح يجيه فرصة ويتعلم ويصير بني ادم مهم بهالعالم،انا الي كتير طموحات والحمد لله اني ما بطلع كتير أعلى من مستوى نظري،يعني مستوى نظري اكبر من طولي بهيك 30 متر ههههه،طموحي كبير ومرتبط بشدة بغزة،نفسي اغير فيها اشي،اغير تفكير وعقليات الناس(مع انها بدها وقت كبير لتتغير بس الافكار الجديدة بدها زمن مش بسيط علشان يتقبلوها الناس)،نفسي اعمل مشروع يهز غزة كلها ويشغل كل الطاقات الشبابية(انتظروني في شركة سلوم للاتصالات وتكنولوجيا المعلومات هههههه وكلكو رح اشغلكو فيها،المهم تكون معاك ايا اشي يثبت انك من قطاع غزة مع انو هادا ما بدو اثبات(

والله كريم ودمتم ذخرا للوطن ونلتقي باذن الله في الحلقة القادمة ،والسلام عليكم ورحمة الله وبركاته ههه

أوه لا لا!!!!

2010-04-07T22:56:00.005+03:00

لما تكون قاعد زيي هيك بتسمع قصص هالبنات كل يوم على مدى عمرك الجامعي ممكن تنجلط!!بتشوف اصناف وأشكال بس المشترك بينهم كلهم الكزب!والدلع البايخ صحيح انا بنت بس بعترف بمعاناة بنات جنسي من الهبل وقلة العقل.فيه أمثلة لا تعد ولا تحصى لهبل البنات ومنها:

*لما تقعد تسمع أمجاد وانجازات البنت في عمل الشاي والقهوة اللي صارت تزبطهم جديد(يا روحي!) بعد عمر طويل مع المعاناة ساعتها بتقول(ي سلام عل تفاهة وهادي انجازات الواحد بيتفاخر فيها)هيا البنت بدها تحسسك انها اوه لا لا وفافي خالص و دلوعة خالص وإمها يا عيني ما بتخليهاش تعمل اشي وغالبا لما تسمع البنت بتحكي هيك اتطلع عأضافرها رح تلاقي بواقي العجين فيهم لأنها صاحية من صباحية الله تعجن!!!

*قصة قلي البيض موضوع تاني خالص اللي بتقول بعرفش أعمل بيض اساسا ماما ما بتفوتني المطبخ،ليش يا قلب إمك مبسوطة كتير!بكرا بس يجيبلك جوزك كيلو سمك ويقلك نضفيه شو رح تقوليلو!!

*عشان ننهي موضوع الطبيخ خالص،بقول لكل بنت قاعدة بتستهبل وبتقول أنا ما بعمل اشي بالبيت انتي فاشلة،مش من مبدأ انو بكرا رح تفتح بيت أو تتجوز لا ،من مبدأ انو هاي أشياء البنت بتبدع فيها ومش شرط تفيدها لمستقبلها بس تاخدها كأي حاجة جديدة بتتعلمها.أنا عن نفسي بقولش اني بعرف اطبخ بس انا بحب اتعلم واجرب وبتفاخر اني بعمل الاكلة الفلانية مش بتفاخر اني بعرفش اقلي بيض!!

*موضوع الحجاب،عندك البنت اللي مفروض انها محجبة بتفتحلك قصة حياتها،أنا الحجاب هادا بلبسو عل جامعة لأنو الشباب بالجامعة بيعلقو(زي كأنو الشباب برا بالشارع راحمينها من التعليقات!)

والي بتقلك هادا الحجاب انا مش مقتنعة فيه اساسا بلبسو عشان ماما بتقول انو الناس بغزة متخلفين!!!(يا عيني عليكي انتي وإمك)والأدهى والأمر بالموضوع انو كل هالأفكار مبنية على أساس إنو الناس الهاي والfree وال open mindedهما اللي ما بيتحجبو!!!هوا يا جماعة الخير زي ما بيقولو العقل زينة،يعني شرط انو البني ادم الي مخو كبير و كلاس انو يكون ضد الحجاب!!(يا صلاة النبي أحسن!)

يعني بالله البنت الي طول النهار تغلط على حزب من الأحزاب ومش متقبلة أفكارهم مثلا انها تقول عن حالها أنا وأهليopen minded‏ وهما ما بدهم اتحجب!!

ولا مثال تاني الناس الي شايفين حالهم ولاد عز لانهم بينتمو لعيلة معينة وكل عيلة تانية كخة!لأنهم لاجئين أو أو أو ومعتبرين حالهم مخهم ماشالله عليه وبيفهمو وكلاس خالص

*موضوع العرسان!!!اجاني اليوم عريس من عيلة كزا(العيلة بتكون كتير محترمة ومعروفة)بس احنا رفضناه لانهم هيك لو كلاس(low class)بحياااااة الله يختيي!!!

اليوم اجاني عريس بس هيك يعني ما ارتحتلو حسيتو ملعوب!!!

اليوم اجاني عريس بس ما حبيت عينيه حسيت فيهم شوية حول!!!!!!!!!!!!!!>>>الله يخزيكي يا شيخة!!

وبتلاقي هادي البنت بتضل لل 29 او 30 ما تجوزت مش عشان ما بدها !!بس علشان ما فيه عرسان من اساسو!!!!ورح تمسك بأول عريس يجيلها

*موضوع السوق(الشوبيييييينج)بتلاقي البنت كل يومين جاية بلبسة جديدة او كل يوم او يوم بعد يوم مش القصة ،القصة انو هيي امها ما بتخليها تروح باللبس مرتين علشان برستيجها !!!!يا حبيبي على هيك برستيج وطبعا لازم تكون على سنجة عشرة من الميك اب للشنط للشوز(اعزكم الله)فيعني طول النهار ما الها شغلة ولا عملة الا انا رحت السوق انا جبت كزا انا رحت كزا وي سلاااااااااام!

طبعا كل هالمواضيع ما بتخلى من التعليقات على البنات التانيين،زي كانها هيا بس بتعرف تلبس والباقيين مش من مستواها الراقي!!!

الله يعين كل الناس على ما ابتلاهم وبس!

غالبا بتلاقي هادي البنت اللي بتلبس كل يومين لبسة ما بتوصل السوق الا مرة كل 30 سنة وكل لبسها من بنات عمها واخواتها واحتمال كمان من بتاخد من امها !!:P

كلمة أخيرة بكل هالمواضيع،الرقي والحضارة والتقدم ما بتنقاس بالشكل الخارجي والفلوس والفياعة الزايدة عن اللزوم،الرقي والعقل الواعي بيبينو من التصرفات والتعامل مع الناس بعدين (الدين المعاملة)،وعلمتني الدنيا ان البني ادم مش مفروض يفتخر باشي غلط بيعملو لأنو شايف من وجهة نظرو(الغلط طبعا)انو رح يكون محترم بعيون الناس لو عمل هادي الأشياء.ياما بنشوف بنات مش محجبات قمة الأخلاق والرقي في التعامل وياما بنشوف العكس!!!

ودمتم راقيين بأفعالكو واقوالكو ودينكو!

فيه اشي غلط!!!

2010-02-02T23:06:00.005+02:00

لما بقعد بفكر بيني وبين حالي بلاقي انو فيه اشياء كتير غلط بحياتنا،،او بالاحرى انتا ممكن تشوفها وما تحس بالمأساة اللي عاايشها الا لما تقعد تفكر بينك وبين حالك في هادي الاشياء
بالفترة الاخيرة من الصدمات الي اجتني بحياتي صرت افكر كتير،كل اشي بيمر عليا ما بيمر مرور
الكرام

1-بيكون فيه اشي غلط لما تلاقي حالك بتقول للي جاي يخطب بنتك انتا مهاجر واحنا مواطنين
2-بيكون فيه اشي غلط لما تتخانق مع اخوك الفتحاوي وتضربو كفين وتطردو من الدار عشان سمعتك عند التنفيذية ما تنهز!!
3-بيكون فيه اشي غلط لما تكون بتدرس طول الفصل وبالاخر تقدم الامتحان منيح وتلاقي ناس ما بيستاهلو اعلى منك علشان الواسطة!!
4-بيكون فيه اشي غلط لما تلاقي حالك قاعد بمطعم وطالب همبرجر وفيه اجنبي قاعد عالطاولة الي جنبك وطالب فتة غزاوية!!
5-بيكون فيه اشي غلط لما تقول سرك لاقرب الناس الك وتلاقي تاني يوم الاذاعات المحلية كلها شغالة على نشر هادا الخبر
6-بيكون فيه اشي غلط لما تحب حدا ما بيستاهل انو ينحب،،تعطيه كل مشاعرك وبالاخر يغدر فيك
7-بيكون فيه اشي غلط لما تلاقي عامل النظافة قاعد بعد ما كنس الشارع وتعب وقعد عل رصيف ياكل ساندويشة فلافل!انو يرمي الجريدةا للي ملفوف فيها السندوش عل ارض(يخرب بيييييتك يا شيخ موتتني لما شفتك)
8-بيكون فيه اشي غلط لما تكتشف انو مسروق منك فلوس او ايا حاجة!وانتا متاكد مين اللي سرقهم وما بتستجري تحكي معاه!!! لانو صاحبك او قريبك او خلافو
9-بيكون فيه اشي غلط لما الحيطان في الجامعة تندهن وتتزبط وتاني يوم بالزبط بتلاقي الخرابيش مالية الدنيا
10-بيكون فيه اشي غلط لما تكون بتتفرج على التلفزيون وكل ما تقلب من قناة للتانية تلاقي ناس بترقص!!والمسجات اللي على الشاشة بتكون بتقول(لا اله الا الله اللهم ارحمنا برحمتك واغث هاييتي!!!!)
11-بيكون فيه اشي غلط لما تكون البنت ماشية بالشارع ولا بتطلع يمين وشمال ولا حاجة ويجيها واحد من وراها يقلها يا انسة انتي مضيعة هادا القلم!!!
12-بيكون فيه اشي غلط لما محسن يبعتلك قلم مكسور نصو!!!!
13-بيكون فيه اشي غلط لما تروح على الدار وتلاقي امك طابخة سبانخ وتنزل تزعق وتفش غلك فيها ،،وتفتح التلاجة بنفس الوقت ما تلاقيش فيها حتى جبنة تعمل ساندوش!!
14-بيكون فيه اشي غلط لما الواحد يكون محتاج يحكي مع حدا،،واختار حدا عزيز عليه عشان يفضفضلو ويشكيلو همو،،يروح الحدا العزيز هادا يكسر بخاطرووو >>رسمييي غلط
15-بيكون فيه اشي غلط لما تكون عايش بغزة وفاهم الوضع كويس جدا!! وييجي حدا من برة ويقلك اللهم انصر ......!!!!!!!!!! ساعتها رسمي لا تعليق
16-بيكون فيه اشي غلط لما تروح توقف يومين كاملين على محطة تعباية الغاز وتلاقي حدا وصل بسيارتو(او الجيب تبعو مش فارقة يعني)واخد الجرة تبعتو ودخل محطة التعبئة وسكر الباب وعبى كل جرار الغاز تبعونو بسرعة فظيعة وانتا الك يومين ناطر!!!
17-بيكون فيه اشي غلط لما تروح السوق وتيجي تشتري تيشيرت ما بيسوى شيكل ويقلك البياع ب 100 شيكل=33$!!! ليش يا باشا هيك،،انتااا مش عارف الانفاق وكيف بتطلع روحنا واحنا بنجيب البضاعة!!!!
18-بيكون فيه اشي غلط لما ييجي عيد ميلادك واكتر شخص نفسك يقلك كل عام وانتا بخير ولا ينطقها!!!!!
19-بيكون فيه اشي غلط لما تحب من طرف تالت!!

20-بيكون فيه اشي غلط لما حدا من اهلك يقلك ي شيخ عاادي بتصير في احسن العائلات اكزب كزبة بيضا ومشي الموضوع!!
21-بيكون فيه اشي غلط ازا حداا منكو ما عبرني ولا حط تعليق على الموضوع!!!!!!!!!!!!

معاناتي مع التاكسيات!!!

2009-11-09T22:41:00.004+02:00

ولا بحياتو خالد الخميسي صاحب رواية تاكسي حواديت المشاوير بيتوقع الايام المأساوية اللي بمر فيها مع سواقين التكاسيات او التكسيات نفسها!!!

بسأل نفسي كل يوم هوا ما فيش قوانين بتحمي الراكب تبع التاكسي من قرف التاكسي!!!

طيب سواقين التاكسي نفسهم مش بيكون التاكسي الهم ليش ما يحافظو عليه اطول فترة ممكنة !! ايش فيه يا جمااعة ليش هييك يعني

*أول ما بركب التاكسي يا اما الكرسي مش مريح يا اما الشباك ما بيفتح او معلق ومش عارفين نسكرو.

*احلى اشي لما يكون فيه ريحة غريبة بتضلك شاممها طول ما انتا بالتاكسي وبتيجيك حالة نفسية بتخليك تشك انها منك انتا نفسك!!

*ابشع اشي بيصير لما يقعد جنبي شب فارد حالو خاالص،،زي كانو مش طايق ايدو ولا رجلو على شوو هيك يعني،،طيب انا بنت ضب حالك شوية مش هيك !!وبتقولو لو سمحت يا اخينا يا ابونا يا حج وابداا لا حياة لمن تنادي بدو يرتاح الزلمة!!!

*أغرب اشي انك تركب مع سواق مفكر حالو مايكل شوماخر(سواق رالي)عنجد يعني من كتر ما الشوارع مساعدة ماشالله عليه طاير طيران والركاب يقولو احنا مش مستغنيين عن روحنا يا عمي مش مستعجلين والاخ يقولنا انتو خايفين لا ما تخافوش(طمنتنا والله يا عين أمك!!).

*ألز تاكسي ركبتو كان تاكسي 7 ركاب كنت مروحة من الجامعة وقعدت للأسف الشديد بالكرسي اللي ورا وكان فيه كرسي بالنص و الركاب اللي كانو قاعدين بالكرسي اللي بالنص كانو من حجوم فوق ال XXXXL و كانو ماليين مركزهم خاالص و مايلين علينا احنا اللي قاعدين وراا وللأسف الشديد انا طويلة واساسا رجليا دوبهم واسعين الكرسي فكانت قمة المأساة فعلا،،

*المأساة بعينها لما يهب على بال السواق او واحد غتت(غتت بتشبه غلس بس على أنقح) انو يدخن،،لا والأخ بيدخن جنب الشباك قال يعني انو مش رح يأثر على الركاب فبيكون التأثير دوبل(يعني مضروب في 2) التأثير الأول من الريحة المقرفة تبعت السجاير وخصوصا لو كان الواحد رايح على جامعتو بدري ومخنوق اساسا من الدنيا كلها فيجيك واحد يسطلك دخان،،واحلى اشي لو كنت قاعد بالكرسي اللي ورا السواق على طول وفاتح الشباك فالأخ العزيز بينفض السيجارة من شباكو وبييجي كل اللي بينفضو عليك (زغرتي ياللي سامعاني).

*للأسف الشديد كتير ناس بيكونو ولا بيعرفو يختارو نوع عطر (قابل للشم البشري)وفيه ناس تانية ما بيعرفو انو فيه اختراع اسمو (ديودرنت=حاجة كدا عشان تمنع العرق)فالناس اللي من النوع الأول بتكون نفسك تسألو عن العطار اللي عملو التركيبة العجيييييييبة اللي راششها على حااالو لا وبيركب السيارة جنبك وبيكون نافش حالو هيك وكلو فخر باللي راشو على حالو،،والناس اللي من النوع التاني برضو بتكون فخورة بس ليش مش عارفة انا صراحة يمكن لانو بدها تبين انها كانت شقيانة من الصبح !!!

*نرجع لسواق التاكسي وزوقه الموسيقي اللي على مستوى عالي جدا،،سواقين التاكسي اللي بصادفهم عموما بيكون مشغل الراديو على اخبار او قران او برنامج هوا مبسوط معاه ،،واللي بيكون مشغل أغاني هادا على مستوى راقي جدا صراحة فبتلاقيه فاتح على الساعة 8 الصبح مصطفى كامل ،،أو هاني شاكر هادا لما يكون السواق سميييع عل اخر،،طبعا كل الاغاني اللي بتكون حزاااينييي خااالص،،وألز اشي ازا بيكون حاطط حكيييم او شعبولا هادي يعني اشي بالمرة كارثة

أكتر اشي ضحكني مرة لقيت سواق مبين انو الدنيا ملطشة معو عل اخر والمسكين يعني ماكل هوا بحياتو وحاططلي اليسااا فقعد جنبو واحد قلو يا حج غيرلنا هادا اللي حاطو حطلنا اشي مفيد فرد عليه السواق بكل فخر وقلو اي هوا فيه بعد أليسا يخوووو(أليسا بفتح الألف وكسر الام وتسكين الياء وفتح السين والباقي عندكو عااد)

*ألز اشي لما تركب مع سواق حابب انو يرغي معااك هوا حابب صراحة،،لو سمحتي يا أخت انتي من عيلة كزاا

انتي طبعا ما بترديش ،،بيرجع بيسألك عن حدا من هادي العيلة

وانتي طبعا ما بترديش ،،بيرجع بيحكي لحالو بصوت عالي طبعا اااه اكيد ما بتعرفيها

طب بتعرفي فلانة ،،وانتي ما بتردي ....بيضل يحكي مع حالو لما يوصلك للمكان اللي بدك اياه!!!

*لما تلاقي سواق مسكيين طول ما انت راكب معاه وهوا بيشتم وبيسب على الحكومة اللي خفضت سعر المواصلات وبيقلك هوا الشيكل شو بيعمل الايام هادي ،،انا ليش بدي اطلع من الجامعة للشفا بشيكل شو بدي اعمل فيه هادا!!!اشتري فيه ساندوش فلافل شو تعمل فيه يعني!!

وبيضل يشتم وبيسم بدنك طول الطريق وبيحسسك انو انتا اللي خفضت سعر المواصلات وشوية ويحسسك انو انتا السبب في الأزمة الاقتصادية بالعالم كلو !وبتصير بدك تعطيه 10 شيكل وتبوس إيدو عشان يسكت!!!

*تجاربي المؤلمة مع سواقين التاكسي زيها زي تجربة كل الناس الطبيعيين اللي ابوهم حارمهم انهم ياخدو السيارة مع انهم معاهم رخصة!!!واللي ما بيقدرو يشترو سيارة لانو السيارات صارت اشي نادر بهالبلد والسيارة اللي كانت تنباع ب 5000 دولار هلقيت ب 10000!!!

ملاحظة::تحية كل التحية لوالدي العزيز ولسيارتنا المرسيدس اللي صرت احلم اني بسوقها :( :( :(!!!!!

سعوديات يقبلن على شراء (القمل) !!!!!

2009-01-25T22:22:00.010+02:00

بتتمسخرو علي!!!رح تشوفو غزو القمل قريبا جدا!!

خبر طريف كتير قعدت أضحك عليه هيك شي ساعة كل ما أتزكرو وأتزكر التبعات تبعتو!!وأتزكر التخيلات اللي حطيتها براسي

مش رح اطول عليكو الخبر وما فيه::

"تقبل الفتيات السعوديات حاليا علي شراء حشرات قمل الرأس مقابل ‏50‏ ريالا للحفنة الواحدة وسط إعلانات مكثفة عن فوائد كبيرة للقمل‏.ومن أهم هذه الفوائد الحماية من الجلطات‏،‏ وتكثيف الشعر‏، وأنه علاج لمنع حدوث الجلطات بالرأس‏، علي اعتبار أن القمل‏، وهو يتحرك بالرأس‏ يقوم بعملية تدليك لفروة الرأس‏، بحسب ما أوردته بعض الصحف السعودية التي أشارت أيضا إلي اعتقاد السعوديات أن القمل يقوم بامتصاص الدم الفاسد ليتغذي عليه‏،‏ وأنه بذلك تتجدد الدورة الدموية ولا تحدث جلطات بالرأس‏."*نقلاً عن موقع عشرينات نقلاً عن جريدة الوطن.

هي اللي ضايل بس !القمل!!!!!!! له له له له والله يعني مش عارفة شو بدي احكي بس القمل!!!دا انتا فاجئتني!!!

كنا بنتمسخر عل قمل وبنعتبرو كائن تافه(مش أوي يعني) خصوصا لو قملة تايهة نطت في شعرك وقعدت تعاني منها مدة(عانيت من هادا الموضوع مرة في حياتي!!)

لا والحلو بالموضوع انو 50 ريال مقابل الحفنة الواحدة من القمل!!يا سلام على هل 50 ريال بتطعمي عيلة عنا!!!.وهما بيروحو يشترو قمل علشان تكثيف الشعر!!!يعني بالله لو ما اشتريتي يختي هالحفنة!!(مع انو اشك انها رح تشتري حفنة واحدة بس)رح تصَلْعِي؟!أو رح تكون الجلطة بالراس بتستناكي علشان تيجيكي لو ما اشتريتي هل كام قملة؟؟!!

إجا عبالي شغلات كتير بعد ما قريت هل موضوع ومن هالشغلات::

_من هون ورايح البنات رح يصيرو يتاجرو بالقمل،بيروحو عل جامعات أو المدراس وبيقولو لبعض والله وصلت للكثافة المطلوبة بشعري رح ابيعك قملاتي الأعزاء وديري بالك هادول القملات اللي خلو شعري زي ما انتي شايفة هيك يعني رح أبيعك القملة الواحدة ب 100 رياال!أكيد انتي موافقة؟آه طبعا لو شعري بدو يصير زي شعرك موااافقة والنبي اعطيني قملاتك!!!

_رح تطلع اعلانات بالتلفزيونات غير النت طبعا عن شركات للمتاجرة بالقمل!!يا سلااام احنا الأرخص احنا الأوفر احنا اللي بنعطي النتائج المضمونة خدلك كام قملة بسعر الجملة ،التلفزيون رح يطفح من كتر دعايات القمل ومش بعيد انو يصير يهرش هوا التاني!وممكن تلاقي زينب العسكري طالعالنا تعمل دعايةعن ماركة للقمل زي ما عملتلنا دعايات عن كريمات الشعر الفاشلة(ما جربتهاش طبعا ههههه)!!!

_بعض الدول اللي بيعزّوه للشعر رح تصير أكبر دول العالم مصدرة لل(قمل!!)بما انو شعورهم طويلة وياما بتلم!!ورح يغنو من ورا شعر(السعوديات خصوصا!!)ورح تصير بعدين متاجرة القمل زي متاجرة الكافيار!!

_رح يصير فيه مزارع للقمل ومتبرعين علشان يعملو إيواء للقمل براسهم (وهادول التانيين رح يربحو!!) واستنساخ لأفضل قملة عملت تغيير جذري في شعر صاحبتها!!

_احتمال كبير الموضوع يصيرلو تبعات أخرى!يعني يوصل لهوليوود مثلا.يعني تلاقي الممثلات بهوليوود قاعدين يهرشو بشعرهم عل بساط الأحمر وتسألهم الصحافة أي نوع قمل بتستعملي؟وهل جاب معاكي نتيجة ولا لأ! ويصيرو الباباراتزي يلحقوهم بكل مكان علشان يشوفو ماركة القمل اللي بيستعملوها .

_ولا أحلى اشي لما يصير فيه نقابات ومؤسسات لحماية القمل من الانقراض!!يا حبيبي ساعتها بتكمل.ويعملو وزير نوايا حسنة للقمل.ويطلع القمل عل تلفزيون يشكي عن حالو وعن القرف اللي شايفو بشعر بعض ناس .

_وممكن كمان يحنطوه للقمل علشان يضل أطول فترة ممكن ،ويعملولو متاحف (تعال وشوف قملة جوليا روبرتس اللي مصتلها دمها واعطتها شعر رااائع)

_رح يتحول كل منهج العلوم بالعالم عن دراسة الDNA للقمل وتكاثر القمل! ورح يصير منهج التاريخ عن حياة القمل في العصور الوسطى،ومنهج الجغرافيا عن أفضل أماكن القمل في العالم!!(ممكن تلاقيه براس حدا هادا المكان عفكرة).

_رح يعملولنا أفلام عن القمل!يعني السينما رح تتعبّى أفلام بأسماء غريبة جداً(قملة أحدثت تغيير،أحبك يا قملتي،قملة ونملة...وخلافو)!!!
يعني كمان رح توصل شهرتو للسينما

فيه كتير تخيلات وتوقعات أجت براسي ،،لا تعد ولا تحصى ،بس عنجد هم بيضحك وهم بيبكي،،بس علشان المصداقية رح أكتب بقية الخبر لأنو الو صورة تانية خالص

"‏من جهة أخرى أكد متخصصون عدم صحة هذا الاعتقاد لان القمل هو من يتغذي علي الشعر وليس العكس‏، كما أنه لا يوجد دم فاسد في جسم الإنسان.‏"

يعني برضو لسا فيه ناس بيجرو دراسات بالموضوع علشان بس ما تستهينو بالقمل!!!!مستنية آراءكو وتعليقاتكو وورجوني إبداعاتكو في ظل الأزمة القملية!

مثل اليوم:

القمل الأسود ينفع في اليوم الأبيض!!

واللي قملتو براسو بيعرف خلاصو!!

ps:مش رح أشترك بالحملة القملية هادي خالص ولو بدهم يبيعوني اياه ببلاش،كلمة أخيرة(يعععععععععععععععععععععع)

ماما وما أحلاها من كلمة!!لأحلى مخلوق بالوجود

2009-01-21T22:11:00.007+02:00

ماما،،كلمة حلوة كتير،وبيفتقدها كتار،بقدم عزائي للناس اللي فقدو أمهاتهم لأنو أكيد رح يتأثرو بأي كلمة تنقال عن الام!

أنا نيالي بهل إم(صلو على النبي من أولها ومن غيرنق)،مامتي أنا هيي أحلى ست بهالعالم.مش عارفة كيف ممكن أقدر أوصف إمي لأنو أكيد بتعجز الكلمات عن الوصف.

لما بشوف بعض البنات كيف بيتعاملو مع أمهاتهم بجفاوة وقلة أدب بقول بيني وبين حالي أنا أهون من هادول،صحيح إنو بيعلى صوتي أحياناً(مش نادراً هيا أحياناً وبيكفي تعليقات هبلة)بس برضو بلاقي حالي أهون من غيري،وأسوأ من غيري برضو.وماما من الأمهات اللي بتستحمل كتير (هيا بتستحمل وبس!!هادي أم فولاذية الله يعينها على ال3 عساسيل اللي عندها!!!).

أمي زي العسل بتلاقيش واحد بيعقد معها إلا وبيحبها لأنها بتحكي مع الكل وبتسمع مشاكل الكل وبتحب الكل.أنا بلاقيها كتير قريبة منا احنا ولادها بشكل كبير لأنها بتحاول تعيش بنفس النمط الي احنا عايشين فيه..أمي بتجنن،وبتعقد لأسباب كتيرة وما بتنعد ومنها:

1-ماما إجتماعية كتير كتير وبتحب الناس،ولا حدا من صحابي ما بيحبها لدرجة انو واحدة من صاحباتي اللي يا ريت تكون بتقرا الموضوع قالتلي إمك قلقيشن تسلفيني إياها كام يوم(طبعا لا يختي لو بدك تطقي وتفرقعي وتموتي لن أتنازل عن إمي يوم واحد بس!).

2-بتفتح الكمبيوتر وبتقرأ مقالات وأخبار وشغلات كتير(يا واد يا مثقف انتا)وبتعلب كمان(كيف بالله هل إم!!)فيعني بحسها مواكبة اللي بيصير ومثقفة جدا وبتفهم بكل اشي وشو ما تحكي معها باي موضوع رح تحكي معاك فيه من السياسة لاخر صيحات الموضة للصحة والغذاء(وبدون نق للمرة التانية).

3-مامتي العزيزة مش حارمانا من اشي والحمد لله،بتنبسط كتير لما تعرف انو طلعت طلعات مع الشلل تبعوني(شلة عبير،شلة لمى،شلة آلاء،طبعا أنا عضو فعال في كل هادول الشلل وصلو ع نبي)ماما بتحب تعرف تفاصيل وين رحنا وشو شفنا وما الى زالك،وطبعا بتحب تشوف الصور وبتنبسط لما تشوف هالعلاقة الحلوة بيني وبين هالصبايا اللي بيعقدو!هيا أحيانا بتبهدلني لأنو اتأخرت بس معاها حق قلقانة علي بتكون.

4-ماما مزوقة كتير بكل اشي وما بتحب تخليني أحس انو فيه حدا احسن مني سواء بلبس أو بمعنويات،،مثلا لو كانت فيه قعدة صبايا عند أي بنت بسألها شو ممكن ألبس وبتعطيني رأيها ولو اخترت لحالي(وهادا غالبا اللي بيصير)بتسيبني عراحتي وبتعلق تعليقات بناءة(مش هدامة خااالص !!)وبترفع معنوياتي(احم احم اساسا القالب غالب).

5-يا سلام عإمي ما احلاها لما تلعب معانا شدة أو مونوبولي(يا مسيطر انتاا)او تلعب طاولة زهر مع بابا العزيز،ولا لما تتنازل وتتفرج معانا على فيلم مع انو احيانا كتيرة بيكون في برنامج حلو ومفيد(عكلامها!) بدها تحضرو واحنا بنقلها بصوت ثلاثي واحد(ليش ما تروحي عالتلفزيون التاني!!)صحيح احنا وقحين!بس هيا بتقدّر مدى التشويق اللي بنكون فيه وبتقعد تتفرج معانا أو بتروح على التلفزيون التاني أو بتاخد الريموت بالغصب!!!(أم ديموقراطية)

6-من الأسباب اللي بترفعلي معنوياتي واللي بحب علشانها امي كتير انها بتواكب الموضة (الملائمة)ولبسها كلو حلو يعني الواحد بينبسط لما يلاقي صحابو بيقولولو والله إمك شيك يا بنت!

7-مامتي طباخة رهيبة جدا جدا جدا وضلكو عدو جدا لما تزهقو،أكلها كتير زاكي(أساسا مين زاكي هادا بالنسبة لطعم أكل إمي)يعني بحسها بتطبخ بنفس حلو وبتحب تطبخلنا كمان لانو احنا بصراحة بنحب الاكل(ومين ما بيحبو يعني!!)فيه كام أكلة فش الها فيهم منافس اللي هما البيتزا،البيصارة(بموت فيها)،الجاج بالخضار،الكبسة،والفول !!،هادول الأكلات عنجد دمار شامل(ما حدش يبلغ أمريكا عنهم)وخوفي ييجي يوم وأصير أغني أحن إلى فول أمي!!.طبعا كل الكلام اللي قريتوه انسوووووووه خاااااالص!!ههههههه بمزح أهلا وسهلا بأي وقت.

8-ماما متفهمة جدا يعني بحب أشاركها ببعض مواضيع بتخصني أو مواقف بتصير معي،ما بتعصب ولا بتبهدل ولا أي اشي بلعكس بتنبسط إني بحكيلها وبتعطيني نصايح بسمع منهاغالباً(يعني بتيجي غالباً هادي زي usually or sometimes).

9-حلو كتير لما الواحد يلاقي حالو بيعيش بجو مستقر أسرياً،يكونو أهلو متفهمين،ومتعاونين،وبيحبو بعض،أنا بحب عيلتي وبحب ماما لأنها قادرة تحافظ على هيك عيلة غلباوية!

10-ماما مقدرة للظروف خااالص،بيكون فيه جلي أو غسيل بدو ترتيب أو اشي بدو تنضيف وبتلاقيني مندمجة مع التلفزيون أو الكمبيوتر فبتعملو لحالها(المسكينة)ويا سلاام عأيام الامتحانات خد دلع لما تشبع.

11-في ستات كتير بحسهم زي إمي بالزبط وبنفس المكانة وبحب أحكي معهم كتير زي عمتو حبيبتي،عمتو عطول بتلاقيها أونلاين عالماسنجر(عمتو تكنولوجية عل ااخر)طبعا ما بقدر أوصف قديش أنا مشتقالها لأنو الي تقريبا 8 سنين أو اكتر ما شفتها،بالمختصر عمتي هاي شهد بينقط عسل.بتحب تحكي وتسمع للكل ونغشة وأحلى اشي فيها انها مواكبة للأغاني الجديدة اللي بتنزل كل شوية بلاقيها باعتالي اغنية كتير حلوة بتقوللي اسمعيها!!(حبيبتي يا عمتو الله يمسيكي بالخير ).طبعا خالاتي كلهم بحبهم(طبعا مش خوات ماما ،بما انو ماما عسل ازن خالاتي عسل)،نسوان أعمامي كمان بحبهم كتير كتير وبتسلا معاهم كتير لما أزهق بنط لهادي وبروح عند هادي يعني أخوية!! هههه

كل اللي حكيتو نقطة ببحر من حلاوة وطعامة ورقة ولطافة ماما حبيبتي ومهما قلت مش رح أقدر أوفيها جزء من اللي بتعملو علشاننا احنا (العساسيل التلاتة!!)

بحبك كتير يا أحلى ماما بالعالم ويا رب يعطيكي طولة العمر ويجعل يومي قبل يومك يا رب!!

مساعدات،،ومساعدات،،ثم مساعدات!!!!!!!!!!!!!!!!!!!

2009-01-16T10:13:00.009+02:00

مبسوطة على كيس الطحين يا حجة!!!!!

ولا عمري بحياتي نخيلت نوصل لهاي الدرجة من المصالح وحب النفس!القصة الكبيرة اللي ماسكاها علينا وسائل الإعلام،المساعدات ،،المساعدات،ثم المساعدات!!!خوتو سمانا بهل قصة وتعال واسأل اي بني ادم عادي بالشعب(طبعا غير اللي بتدعمهم الأنروا)بيقللك أي مساعدات هادي؟؟!!طبعا هوا ما بيكون عندو فكرة عنها من اساسو لانو ما عندو كهربا يتفرج عل تلفزيون في دارو أو انو ما عندو دار اصلا!!

حسب ما بسمع من وسائل الاعلام النزيهة جداً!!(ما بشكك بنزاهة حدا عفكرة)انو هل مساعدات نازلة تكب على غزة من بلاد الدنيا كلها ازا بلاد الواق واق تبرعولنا يا جماعة !!!بس المشكلة انو معظم الشعب المحتاج ما بيشوفها.

بالنسبة للأنروا(طبعا بقدم عزائي الشديد بسبب البلاوي اللي انحرقت بمخازنهم)الأنروا بتوزع معوناتها للاجئين!ليش هوا ضل بهالوضع حدا مش لاجيء؟يعني بتلاقي واحد لسا مستلم كيس طحين(الله يباركلو فيه ازا ضل عندو وما باعو)وجارو المسكين اللي عندو 10 انفار في الدار مش ملاقي يطعميهم خبز ومية!!!انا بقول كل هالشعب ماكل هوا لحد ما انتفخ من كتر الهوا ومفروض الأنروا توسع نطاق شغلها ويصير يشمل كل الناس المحتاجين عنجد مش اللي بيستلم وبيبيع!

سيبونا من الأنروا وبيكفينا نق عليهم(الله يمسيكي بالخير يا طنط منيرفا لو كنتي سامعة)المساعدات اللي بتيجي من براوفاتحين الها المعابر وحاسبينها علينا مساعدات"للشعب الفلسطيني"يعني الي والك والها والو !!!
هاي المساعدات ما فيها عدالة بالتوزيع بل مرّة لانو هادي كمان بيدخل فيها فيتامين واو(ماشالله وفيها فيتامينات كمان!!)

المساعدات بتدخل من هان والجهات المسؤولة بتسيطر عليها من هناك علشان توزعها بالعدل!!(أهلا وسهلا والله)أو تعمل عليها مزاد للتجار المحتكرين(أهلين وسهلنين)!!ولا كيف بدهم يجيبو مصاري علشان يصرفو على موظفين الحكومة الرشيدة!!

انا ما بنتقد انتقادات جاية من فراغ لانو هادا اللي بيصير عأرض الواقع وشايفة انو وضعنا بدل ما يكون متماسك كل شوية وهوا متفكك أكتر خصوصا بقصة لاجيء ومواطن!!

غزة حاليا وضعها يرثى له وعيب خالص تطلع فئة معينةعل تلفزيونات تشحت عاسم الشعب الفلسطيني الغلبان وبالاخر الشعب ما يطولش رغيف خبز.

قبل كام يوم اجا عند بيتنا (بوقت الهدنة طبعا)عرباية بيجرها حمار_أعزكم الله_(كارّة من الاخر)وعليها شوية غراض من المساعدات اللي جاية عغزة،اوعو تفهموني غلط وتفكرو انو الراجل اللي عل كارّة(اللي هيا نفسها العرباية)جاي يتصدق فيها عن روح بنت عمة خالة مرتو!!لا طبعا لانو جاي يبيع ويسترزق بعد ما شبع هوا وولادو(الله يديمها عليهم نعمة!!) سواء من الأنروا أو من المساعدات اللي نازلة زي المطر عل غلااااابة!!!

لا واللي بيضحك بل موضوع انو اسرائيل فاتحة المعابر على مصرعيها لكل هاي الاشياء لانو طبعا عارفة لجيوب مين رح تروح!!وهيا المستفيدة انو الشعب يشبع!!!وبتقولو لسا عل يهود عاطلين له له له!!!!

طبعا الحمد لله ،،الله كافينا ومنعم ومتفضل علينا ومش محتاجين لا مساعدات أونروا ولا دول مانحة ولا بطيخ حتى! كل اللي بهدف الو من هل كلام كلو انو هالناس تستحي شوي وتحن عبعضها(طيقو بعض يا عاااالم بهالظروف بس)واللي ناقصو اي اشي يتفضل عنا(من يوم يومي كريمة!!)

"إن الله لا يغير ما بقوم حتى يغيروا ما بأنفسهم"آية 11 سورة الرعد.

وبقول لكل الناس اللي برا فلسطين وبيتبرعولنا:بيكفي تبرعااات يا عاااااااالم احنا شعبنا خلاااص شبع عل آآآخر ومش قادرين نتنفس ولا نستحمل كمان تبرعات(كدا كفاية كدا طحيين كدا كفاية والله كفاية)!!!

وسلامتكم والله يكتبلكم كيس طحين ينزل من السما بدل هالصواريخ والقذائف اللي مش راضية توقف !!

طيارات اخر زمن!!

2009-01-07T10:19:00.006+02:00

الصوت كان هاي الليلة لا يطاق.طيارات ال F16 مش ناوية تجيبها لبر خاالص.قصفت كام موقع وحابانا كتير ومش قادرة عفراقنا!!

انا عفكرة من جديد عرفت الفرق_وأخيراً_بين ال F16 والاباتشي،الاباتشي دايما بنشوفها بتلفلف في السما هيا هليوكبتر بمروحة(عكلام واحد سمعتو بيحكي بالشارع) ومسالمة نوعا ما(عكلامي انا)او انها بتحملش صواريخ كتار انا شو بيعرفني هيني بحاول(ببقا أسأللكو الشخص اللي شفتو بالشارع اكيد عندو فكرة).

المهم ال F16 طيارة طيارة ملوي هدومها بجناحين وكاملة ومكملة(الله يكملها بصواريخها ويبعدها عنها قولو آمين >>آآآآآآمين)هاي الطيارة عنجد فظيعة مجرد مرورها مرور الكرام بيلمس وبيدب الرعب وبتصيب البني ادم نوبة قشعريرة وممكن يوقف قلبو ويموت من الخوف وهوا بيستنا صاروخ ينزل منها اي مكان والسلام المهم ينزل ويريح.

من كتر ما هالطيارة استهوتني قلت انبش واشوف ايش اخبارها بالزبط.شوفو هادا الرابط(بعدين مش هلقيت).المهم بالمختصر المفيد انو صناعتها أمريكية(صلاة النبي أحسن)_طبعا انا بعرف هادا الكلام لأول مرة وانتو احتمال كبير ازا مش اكيد تكون ثقافتكو عمستوى أكبر بس انا ما بتستهويني هيك شغلات من اساسو_

وهالطيارة بتمتلكها دول عربية كتيرة منها مصر والمغرب والامارات طبعا الكل عارف ليش الدول العربية بتمتلكها واللي مش عارف ياخد فكرة اهي تنفعو برضو لو كان عقلو فوّت ولا حاجة(الله لا يمسيك بالخير يا مصري ياللي في بالي):::

1-لانو عيب رئيس يشتري اشي والتاني يقعد يتطلع(من مبدأ المساواة الشرائية بين الرؤسا).

2-وعيب كمان بعيد استقلال كل دولة يطلعلو كام طيارة يتمنظر فيها ورئيس الدولة التانية بعيد استقلالها برضو ما يطلعش يوووه عيييب(من مبدأ المساواة الاحتفالية بين الرؤسا برضو).

3-وعيب برضو ازا امريكا حابة تنفق بضاعتها البايرة(بيكون عجل الطيارة فالت او الصاروخ مبرد)وحبت تبدلها بالنفط نقولها لاا!!!( من مبدأ خد وما تكسفنيش).

4-وعيب برضو الدول العربية ازا الله من عليها بشوية ملايين انها تصرفهم عل فاضي.يعني بيني وبينكو تبعتهم للمحتاجين بفلسطين ولا تشتري طيارات؟؟والحدئ يفهم :P

5-طبعا واكبر عيب ازا اجا عبالكو انو هالطيارات ممكن تطلع من المخازن وتحارب هيا لو أمريكا عارفة انو لو هادا الاحتمال وارد كان ما باعتهم للعرب أصلا!!

ويا جماعة الطيارة مش غالية كلها 14 مليون دولار.تيجو كل واحد يلم من الحارة تبعتو؟قولتكو لو لمينا المصاري رح ترضا خالتو امريكا تبيعنا؟؟

1-سواء من مبدأ المساواة الشرائية اللي احنا معناش حقها من اساسو مع انو شايفة ميزانية دولتنا المالية ممكن تغطيها بدل ما هيا هالكانا مشاريع بنى تحتية ومولات ومدن ملاهي ضخمة>>>كيف بالله!!!

2-او المساواة الاحتفالية الي مالناش دولة علشان نحتفل فيها بيعطونا هاليوم الاجازة وبنعرفش ليش معطلين من اصلو!!!اهو يوم عطلة والسلاام الا طبعا ازا فتحتو على تلفزيون فلسطين ممكن تاخدو فكرة ليش احنا عطلنا اليوم !!!

3-او المساواة في المبدأ الأخير(خد وما تكسفنيش)تعمللنا اياه مبدأ(الي معوش ما يلزموش،وعيب تتطلع عللي في ايد غيرك،والدين مسموح كل يوم ما عدا اليوم)واستحو عاد لانو ديونكو كترت!!

وسلامتكو وتعيشو هانئين البال وبعيدين عن اصوات ال F16!!!!

ليلة عيد ميلادي!!!

2009-01-03T18:25:00.008+02:00

سنة جديدة مرت من عمري بحلوها ومرها وانا لساتني عايشة وبصحة منيحة الحمد لله

عشت كتير حزن وعشت كتير فرح وتعلمت كتير اشياء وتعلمت من كتير ناس،اكتسبت خبرات وزعلت كتير ناس مني على حساب ناس تانيين واكتسبت كتير اصحاب حلوين وبيعقدو.تعلمت انو::

-اهلي ربوني على شغلات معينة وبيتوقعو مني تصرفات وردات فعل منيحة ومفروض انا اعمل كل اشي بيرضيهم وما ازعلهم مني لانهم الهم اكبر الفضل في حياتي وما في حياتهم كبتو حريتي او منعوني من اشي نفسي فيه، بقول لماما شكرا كتير انك مستحملة همي وبقول لبابا اسفة كتير لانو عملت كتير تصرفات سيئة(بنظرك)بس بنفس الوقت عرفت قديش انا ممكن اتحمل المسؤولية،بحبكم وسامحوني.

-الصداقة شي حلو كتير كتير وممكن البني ادم فينا ما يتوقع بحياتو انو هادا الشخص ممكن يكون من اعز صحابو،بس في حياتي كلها (مش طويلة كتير كلها 19 سنة)ما توقعت انو يكون الي هادا الكم من الاصحاب ومش اي اصحاب ولكن جدا مخلصين وبيحبوني وبيوقفو جنبي مع اني مقصرة دايما معاهم،اول سنة تمر بحياتي وما اخاف ازا تدايقت لانو عارفة اني رح الاقي كتار جنبي.

-مش سهل ابدا ان الواحد يلاقي حدا بيحبو بس سهل وسريع جدا انو يفقدو لاتفه سبب سواء اختلاف وجهات نظر او بيئات وثقافات وطبعا مش سهل ابدا على اي بني ادم انو يتغير علشان حدا،ما بيقدر يغير بيئتو والناس اللي بتأثر فيه بسهولة ،الموضوع بدو شوية تضحية.

-اسفة كلمة مش بسيطة مع انو في كتار بيستهترو فيها.انا بقول اسفة لناس بطلت احكي معهم لانو لكل اشي حدو ولو كنت حاسة انها رح توصل لهيك كان ما في حياتي فكرت اني انبش واعرف ماضيهم.فأحيانا الانسان هوا اللي بيجيب الزعل لحالو لانو بيكون بدو يعرف شغلات مش لازم ابدا يعرفها.

-تعلمت اني اساعد الناس عقد ما اقدر،اوقف جنبهم ،ادعمهم ،اعمل اي اشي بدون ما استنا مقابل وتعلمت امسح كلمة يا خسارة!!

-الحب والكره اشي مش معقد خالص وما بيحتاج لنفاق ولكن مش كويس خالص اني اوهم ناس اني بحبهم واعطيهم امل وانافقهم واحكي بلسان حلو مع اني ما اكون بطيقهم،مش لازم اشتم حدا علشان ابين كرهي الو بس بنفس الوقت مش لازم ابين اي حب مش موجود.

-الايمان بالقضاء والقدر اشي كبير،فقدت كام حدا بحبهم السنة اللي فاتت سواء بطلت احكي معهم بسبب سوء تفاهم او انهم ماتو لانو الله كاتبلهم هيك وبكلا الحالتين لازم نسلم لامر الله لانو هوا كاتب هيك واكيد الموضوع بيكون فيه خير كتير.

-الكزب اشي بشع كتير.انا غلطت بكتير مواضيع وعلى كتير ناس وكزبت بشوية شغلات مش علشاني بس علشانهم واكتشفت انو ما كان مفروض اني اعمل هيك ولكن كان المفروض اني اسيب الامور تمشي زي ما هيا وما احاول احسنها بكزبة وحتى ولو كانت بيضا!!

-مش ندمانة ابدا على اي اشي انا بعملو علشان خاطر حدا انا حبيتو من كل قلبي ولو كل الدنيا رح تحاربني انا رح اضل احبو ومستعدة استناه العمر كلو حتى ولو ما كان رح ييجي بس انا رح استناه لانو صعب الواحد يقدر يحب حدا وينساه بسهولة وسرعة.وصعب كمان الانسان يقدر يكون مخلص اكتر من مرة بحياتو سواء لحبيب او صديق.

-الوطنية وحب الارض والبلد اشي مش تافه خالص لانو في دم البني ادم وما بقدر استحمل اي حدا يسمي حالو_ فلسطيني_ وهوا مش مستعد يجرب يعيش يوم واحد بس بفلسطين.

شكرا لكل الناس اللي واسوني بهادا اليوم !!!!

كيف بنقضيهاا؟؟!!!!

2008-12-31T18:38:00.007+02:00

الليلة رح تصادف سنة جديدة رح تخلص ال 2008 بكل همومها وقرفها وحلوها ومرها وتيجي ال 2009!!!!!بالله شووو عنججججد

الليلة بكل دول العالم الناس بيقضو ليلة من العمر بيطلعو بينبسطو بيسهرو مع بعض وان ما طلعو بيسهرو قدام التلفزيون بيتسلو بال popcorn او البزر

في غزة

قاعدة بكتب بالموضوع عأنغام منتصب القامة أمشي وقررت شركة الكهربا انها تعيدنا عيدية راس السنة بانها تجيب الكهربا الليلة سبحان الله طبعا!!

طبعا الطيارات لسا بتقصف برا والناس برضو لسا بتموت!!وانا بيني وبين حالي قاعدة بفكر معقول داخلين على سنة جديدة!!!لهاي الدرجة صرنا ولا اشي ولا النا اي اعتبار عند اي حدا؟ براسي في دوامات بتلف هل يا ترى السنة الجاية رح تكون احسن ؟؟ليش هوا السنة الي فاتت كانت احسن من قبلها!!!

مش متخيلة كيف احنا بغزة عايشين او كيف ممكن انو نتسمى عايشين؟سنة جديدة وهم جديد وبلاوي جديدة نازلة تحط على روسنا.السنة اللي فاتت في متل هادا الوقت كنا مبسوطين مش كتير بس مبسوطين شوي

بنبعت مسجات لبعض علشان راس السنة وكل عام وانتو بخير وخلافو ،واللي ما معو رصيد بيعبرنا برنة عل اقل،هلا صارت الساعة 12 ولا حدا من صاحباتي ولا من معارفي عبرني بمسد كول حتى!!!لهدرجة وصل مدى القرف لا لا استنو شوي

وصلتني مسج من واحدة صاحبتي وكل فكري انها تزكرتني بمسج رهيب

شوفو شو المسج مكتوب فيه

look outside.. F16 Smiling for u..Zanana singing for u.. all that cuz i wanted to say happy new year

يعني حتى المسجات لم تخلو من النكد الي احنا عايشينو.يعني بدت السنة الجديدة عنا على انغام طائرات الاباتشي وال F16(انا ما بعرف انواع الطيارات بس بسمع هه)وطبعا طائرات الاستطلاع الي احنا بنسميها الزنانات لانها خرمتلنا طبلة دينينا من كتر زنها.

وبكل الاحوال لسا بنقول لبعض happy new year

انا بطبيعتي طموحة ومتفائلة جدا بس لاول مرة من زمان يوصل تفاؤلي لمرحلة فظيعة الي هيا عدم الاحساس اساسا بالوضع الي حواليا علشان اتفائل.لما بيكون جوالي مسكر واجي افتحو حاطة انو يطلعلي مسج نصو(So Optimistic)بس الي كام يوم بفكر اغيرها

عل عموم طبيعة هادا الموضوع جدا بينكد عل بني ادمين وبيعصبهم وبينرفزهم وبيقرفهم فازا صار الكو اي اشي وانتو بتقروه فتقبلو مني خالص اسفي وندمي وشوقي ولهفة قلبي على مشاعركو

بس شو بدي احكي غير انو Happy new year we welcome to gaza

وسلامتكم وتعيشو بهنا وسعادة بعيد عن النكد انشالله

سنة سعيدة عليكو وعللي خلفوكو

مالاّ بدااية!!!

2008-12-31T18:04:00.005+02:00

بداية مش عارفة شو ممكن أسميها.عملت هادا البلوج بصعوبة >مش شديدة كتيير يعني لانو الكهربا وظروفها هون في غزة مش طبيعية بالمرة.خطر على بالي ليش ما اكون متل هادول البلوجرز.كنت بحكي مع امي بالموضوع عل غدا قالتلي اعملي اللي بدك اياه(يعني ماخدة الاذن من ماما يا جماعة لول :D) المهم قالتلي بس اوعي تصيري زي هادول اللي بيحبسوهم كل فترة والتانية علشان مقالاتهم،قالتلي ولا الك دخل في فتح ولا في حماس،قلتلها ماشي يماااا.من الروقان والفوقان الشديد الي انا فيه انو قاعدة بكتب ولا دارية بالعالم الخارجي شو بيصير فيه.القصف لسا شغال والطيارات لسا شغالة والناس بتموت.انا ملاقية حالي انا الوحيدة اللي لسا ما متت،حاسة كل الناس برا بتموت واحنا ولا هنا،نفسي اعمل اشي اساعد فيه بس مش طالع بايدي اعمل اشي غير التليفون اللي طول النهار قاعدة بكلم بصاحباتي والناس اللي بنعرفهم علشان اتطمن انو ما صار فيهم اشي،طبعا الكل منيح _جسديا_بس النفسية كلها مدمرة .وبنضل بنقول(الله بيعين)يمكن ييجي هل يوم اللي ما اخاف فيه وانا بكتب انو تقطع الكهربا ويروح تعبي عل فاضي

هادي البداية تبعت البلوج تبعي بس انا حبيت اشارككو فيها الواقع المؤلم اللي بنعيشو وانشالله بتشوفو شغلات حلوة وطبعا حسب التشجيع والدعم

ادعولنا نضل بخيييير