9 نوفمبر 2009

معاناتي مع التاكسيات!!!





ولا بحياتو خالد الخميسي صاحب رواية تاكسي حواديت المشاوير بيتوقع الايام المأساوية اللي بمر فيها مع سواقين التكاسيات او التكسيات نفسها!!!
بسأل نفسي كل يوم هوا ما فيش قوانين بتحمي الراكب تبع التاكسي من قرف التاكسي!!!
طيب سواقين التاكسي نفسهم مش بيكون التاكسي الهم ليش ما يحافظو عليه اطول فترة ممكنة !! ايش فيه يا جمااعة ليش هييك يعني

*أول ما بركب التاكسي يا اما الكرسي مش مريح يا اما الشباك ما بيفتح او معلق ومش عارفين نسكرو.
*احلى اشي لما يكون فيه ريحة غريبة بتضلك شاممها طول ما انتا بالتاكسي وبتيجيك حالة نفسية بتخليك تشك انها منك انتا نفسك!!

*ابشع اشي بيصير لما يقعد جنبي شب فارد حالو خاالص،،زي كانو مش طايق ايدو ولا رجلو على شوو هيك يعني،،طيب انا بنت ضب حالك شوية مش هيك !!وبتقولو لو سمحت يا اخينا يا ابونا يا حج وابداا لا حياة لمن تنادي بدو يرتاح الزلمة!!!

*أغرب اشي انك تركب مع سواق مفكر حالو مايكل شوماخر(سواق رالي)عنجد يعني من كتر ما الشوارع مساعدة ماشالله عليه طاير طيران والركاب يقولو احنا مش مستغنيين عن روحنا يا عمي مش مستعجلين والاخ يقولنا انتو خايفين لا ما تخافوش(طمنتنا والله يا عين أمك!!).

*ألز تاكسي ركبتو كان تاكسي 7 ركاب كنت مروحة من الجامعة وقعدت للأسف الشديد بالكرسي اللي ورا وكان فيه كرسي بالنص و الركاب اللي كانو قاعدين بالكرسي اللي بالنص كانو من حجوم فوق ال XXXXL و كانو ماليين مركزهم خاالص و مايلين علينا احنا اللي قاعدين وراا وللأسف الشديد انا طويلة واساسا رجليا دوبهم واسعين الكرسي فكانت قمة المأساة فعلا،،

*المأساة بعينها لما يهب على بال السواق او واحد غتت(غتت بتشبه غلس بس على أنقح) انو يدخن،،لا والأخ بيدخن جنب الشباك قال يعني انو مش رح يأثر على الركاب فبيكون التأثير دوبل(يعني مضروب في 2) التأثير الأول من الريحة المقرفة تبعت السجاير وخصوصا لو كان الواحد رايح على جامعتو بدري ومخنوق اساسا من الدنيا كلها فيجيك واحد يسطلك دخان،،واحلى اشي لو كنت قاعد بالكرسي اللي ورا السواق على طول وفاتح الشباك فالأخ العزيز بينفض السيجارة من شباكو وبييجي كل اللي بينفضو عليك (زغرتي ياللي سامعاني).

*للأسف الشديد كتير ناس بيكونو ولا بيعرفو يختارو نوع عطر (قابل للشم البشري)وفيه ناس تانية ما بيعرفو انو فيه اختراع اسمو (ديودرنت=حاجة كدا عشان تمنع العرق)فالناس اللي من النوع الأول بتكون نفسك تسألو عن العطار اللي عملو التركيبة العجيييييييبة اللي راششها على حااالو لا وبيركب السيارة جنبك وبيكون نافش حالو هيك وكلو فخر باللي راشو على حالو،،والناس اللي من النوع التاني برضو بتكون فخورة بس ليش مش عارفة انا صراحة يمكن لانو بدها تبين انها كانت شقيانة من الصبح !!!

*نرجع لسواق التاكسي وزوقه الموسيقي اللي على مستوى عالي جدا،،سواقين التاكسي اللي بصادفهم عموما بيكون مشغل الراديو على اخبار او قران او برنامج هوا مبسوط معاه ،،واللي بيكون مشغل أغاني هادا على مستوى راقي جدا صراحة فبتلاقيه فاتح على الساعة 8 الصبح مصطفى كامل ،،أو هاني شاكر هادا لما يكون السواق سميييع عل اخر،،طبعا كل الاغاني اللي بتكون حزاااينييي خااالص،،وألز اشي ازا بيكون حاطط حكيييم او شعبولا هادي يعني اشي بالمرة كارثة

أكتر اشي ضحكني مرة لقيت سواق مبين انو الدنيا ملطشة معو عل اخر والمسكين يعني ماكل هوا بحياتو وحاططلي اليسااا فقعد جنبو واحد قلو يا حج غيرلنا هادا اللي حاطو حطلنا اشي مفيد فرد عليه السواق بكل فخر وقلو اي هوا فيه بعد أليسا يخوووو(أليسا بفتح الألف وكسر الام وتسكين الياء وفتح السين والباقي عندكو عااد)

*ألز اشي لما تركب مع سواق حابب انو يرغي معااك هوا حابب صراحة،،لو سمحتي يا أخت انتي من عيلة كزاا
انتي طبعا ما بترديش ،،بيرجع بيسألك عن حدا من هادي العيلة
وانتي طبعا ما بترديش ،،بيرجع بيحكي لحالو بصوت عالي طبعا اااه اكيد ما بتعرفيها
طب بتعرفي فلانة ،،وانتي ما بتردي ....بيضل يحكي مع حالو لما يوصلك للمكان اللي بدك اياه!!!

*لما تلاقي سواق مسكيين طول ما انت راكب معاه وهوا بيشتم وبيسب على الحكومة اللي خفضت سعر المواصلات وبيقلك هوا الشيكل شو بيعمل الايام هادي ،،انا ليش بدي اطلع من الجامعة للشفا بشيكل شو بدي اعمل فيه هادا!!!اشتري فيه ساندوش فلافل شو تعمل فيه يعني!!
وبيضل يشتم وبيسم بدنك طول الطريق وبيحسسك انو انتا اللي خفضت سعر المواصلات وشوية ويحسسك انو انتا السبب في الأزمة الاقتصادية بالعالم كلو !وبتصير بدك تعطيه 10 شيكل وتبوس إيدو عشان يسكت!!!

*تجاربي المؤلمة مع سواقين التاكسي زيها زي تجربة كل الناس الطبيعيين اللي ابوهم حارمهم انهم ياخدو السيارة مع انهم معاهم رخصة!!!واللي ما بيقدرو يشترو سيارة لانو السيارات صارت اشي نادر بهالبلد والسيارة اللي كانت تنباع ب 5000 دولار هلقيت ب 10000!!!
ملاحظة::تحية كل التحية لوالدي العزيز ولسيارتنا المرسيدس اللي صرت احلم اني بسوقها :( :( :(!!!!!

هناك 10 تعليقات:

  1. آه من ذلكَ الغبي الذي كادَ أن يلتصقَ بي لولا أن أنقذتني تلكَ الحقيبةُ بيني وبينه !

    لن أتطرّق بالحديثِ عن شكل تلكَ العرباتِ لأن الوضع هُو المتحكم الرئيسي " بجيبة " ذلكَ السائق " الحكيان " ، ..

    أعانني الله على تنقّلي بينَ 4 سياراتٍ كل يوم بذهابي للجامعة ، وحكاياتٍ تصبيني بالصداعِ مع كلّ سيارة تُنزع من يومي لباسَ فرحه .

    مقالُك جميل صديقتي ، " وفتّح الجروح "
    :)

    ردحذف
  2. هههههههههه ... خطيرة خطيرة خطيرة يا إسلام .. الله يعينك على معاناتك .. ويعينا كلنا ..
    وهادي المعاناة صارت جزء من حياتنا و تقريباً اتعودنا عليها ..
    بس بيضلوا الواحد يحكي يا ريت !! ..

    كتييييييييييييير حلو مقالك

    حبيتو
    :)


    ريم

    ردحذف
  3. هههه فعلا ياسلوووم بحسسوكي انك سبب الازمة الاقتصادية وانهيار سعر الدولار خخخخخخخ ,, بس انشالله عن ئريب بتجيبي سيارة وبتميلي تاخديني ع الجامعة هوا اوكي انا بيتي ئريب ع الجامعة بس لامانع انك توصليني كمان ;)


    REDA

    ردحذف
  4. امممممممممممم

    فعلا القاضي فاضي ليشتغل بالعالم سواء السواق ولا راكب التاكسي
    فعلا معانااااااااااه
    ايام ما كانت المواصلات حسب التسعيرة القديمة تلاقي 20 30 سيارة بطوط الك
    بس دخيل ربك تعال اركب
    اليوم لأ ولا بتلاقي ربع سيارة
    اخ زمان اعوج اب اعوج

    غير قصص السواقين الي ما بتخلص
    فعلا ايام بكون الوا خاطر الزلمة يصيح مشان تحن عليه
    وتديه بزيادة

    المهم غير الي بكون حاطط ام كلثوم الصبح وبالمسا بحطلك فيروز قلب كل الشكال والاوصاف الرومنسية

    وغيروا وغيروا

    ردحذف
  5. جميلة جدا التدوينة يا سلووم
    عجبتني كتير
    وضحكتيني،، فعلا الواحد بيضحك لكن بنفس الوقت بتضل معاناة
    الله يعينا

    تحياتي

    ردحذف
  6. والله يا عمتي معاناتك بتجنن معلش اتحملوا هالفئه الغلبانه من الناس طول عمر التاكسيات نافذه على العالم ههههههههه ممكن تعرفي كل اخبار الدنيا في مشوار صغير

    بس اجمالا الموضوع كله عجبني وعقبال عندك بالمرسيدس ولو انه انا بافضلك ال b m w لايقه عليكي اكتر

    ردحذف
  7. والله أنا كنت أفكر إنو هاي المعاناه مع التكاسي بس بالأردن, بس شكلها مشكلة على مستوى عالمي !

    ردحذف
  8. سرد رااااائع جدا

    اخر مرة قرأت في المدونة قصة الجلبات، وها انا اقرأ هذا السرد المميز بلغة طريفه وشعبية (كنت بدي اجيب مؤنث شعبولة عبد الرحيم معرفتش)

    ردحذف
  9. للمزيد من حكايات السواقين

    http://www.iopal.net/forum/showthread.php?t=5800

    ردحذف
  10. والله التكسيات هالايام صارت موضة كمان
    بس معاناة التكاسي مش مشكلة امام عدة مشاكل
    الواحد كان زمان من اما الجامعة بركب السيارة اليوم الواحد بينزل لعند الموقف عشان يركب

    *احلى اشي لما يكون فيه ريحة غريبة بتضلك شاممها طول ما انتا بالتاكسي وبتيجيك حالة نفسية بتخليك تشك انها منك انتا نفسك!!

    في منو الكلام بس انا مريح راسي ما بركب في السيارة الا لمن اكون في الكرسي الامامي يا هيك يا بلاش هههههههههه

    ردحذف