7 أبريل 2010

أوه لا لا!!!!




لما تكون قاعد زيي هيك بتسمع قصص هالبنات كل يوم على مدى عمرك الجامعي ممكن تنجلط!!بتشوف اصناف وأشكال بس المشترك بينهم كلهم الكزب!والدلع البايخ صحيح انا بنت بس بعترف بمعاناة بنات جنسي من الهبل وقلة العقل.فيه أمثلة لا تعد ولا تحصى لهبل البنات ومنها:
*لما تقعد تسمع أمجاد وانجازات البنت في عمل الشاي والقهوة اللي صارت تزبطهم جديد(يا روحي!) بعد عمر طويل مع المعاناة ساعتها بتقول(ي سلام عل تفاهة وهادي انجازات الواحد بيتفاخر فيها)هيا البنت بدها تحسسك انها اوه لا لا وفافي خالص و دلوعة خالص وإمها يا عيني ما بتخليهاش تعمل اشي وغالبا لما تسمع البنت بتحكي هيك اتطلع عأضافرها رح تلاقي بواقي العجين فيهم لأنها صاحية من صباحية الله تعجن!!!

*قصة قلي البيض موضوع تاني خالص اللي بتقول بعرفش أعمل بيض اساسا ماما ما بتفوتني المطبخ،ليش يا قلب إمك مبسوطة كتير!بكرا بس يجيبلك جوزك كيلو سمك ويقلك نضفيه شو رح تقوليلو!!

*عشان ننهي موضوع الطبيخ خالص،بقول لكل بنت قاعدة بتستهبل وبتقول أنا ما بعمل اشي بالبيت انتي فاشلة،مش من مبدأ انو بكرا رح تفتح بيت أو تتجوز لا ،من مبدأ انو هاي أشياء البنت بتبدع فيها ومش شرط تفيدها لمستقبلها بس تاخدها كأي حاجة جديدة بتتعلمها.أنا عن نفسي بقولش اني بعرف اطبخ بس انا بحب اتعلم واجرب وبتفاخر اني بعمل الاكلة الفلانية مش بتفاخر اني بعرفش اقلي بيض!!

*موضوع الحجاب،عندك البنت اللي مفروض انها محجبة بتفتحلك قصة حياتها،أنا الحجاب هادا بلبسو عل جامعة لأنو الشباب بالجامعة بيعلقو(زي كأنو الشباب برا بالشارع راحمينها من التعليقات!)

والي بتقلك هادا الحجاب انا مش مقتنعة فيه اساسا بلبسو عشان ماما بتقول انو الناس بغزة متخلفين!!!(يا عيني عليكي انتي وإمك)والأدهى والأمر بالموضوع انو كل هالأفكار مبنية على أساس إنو الناس الهاي والfree وال open mindedهما اللي ما بيتحجبو!!!هوا يا جماعة الخير زي ما بيقولو العقل زينة،يعني شرط انو البني ادم الي مخو كبير و كلاس انو يكون ضد الحجاب!!(يا صلاة النبي أحسن!)

يعني بالله البنت الي طول النهار تغلط على حزب من الأحزاب ومش متقبلة أفكارهم مثلا انها تقول عن حالها أنا وأهليopen minded‏ وهما ما بدهم اتحجب!!

ولا مثال تاني الناس الي شايفين حالهم ولاد عز لانهم بينتمو لعيلة معينة وكل عيلة تانية كخة!لأنهم لاجئين أو أو أو ومعتبرين حالهم مخهم ماشالله عليه وبيفهمو وكلاس خالص

*موضوع العرسان!!!اجاني اليوم عريس من عيلة كزا(العيلة بتكون كتير محترمة ومعروفة)بس احنا رفضناه لانهم هيك لو كلاس(low class)بحياااااة الله يختيي!!!
اليوم اجاني عريس بس هيك يعني ما ارتحتلو حسيتو ملعوب!!!
اليوم اجاني عريس بس ما حبيت عينيه حسيت فيهم شوية حول!!!!!!!!!!!!!!>>>الله يخزيكي يا شيخة!!
وبتلاقي هادي البنت بتضل لل 29 او 30 ما تجوزت مش عشان ما بدها !!بس علشان ما فيه عرسان من اساسو!!!!ورح تمسك بأول عريس يجيلها

*موضوع السوق(الشوبيييييينج)بتلاقي البنت كل يومين جاية بلبسة جديدة او كل يوم او يوم بعد يوم مش القصة ،القصة انو هيي امها ما بتخليها تروح باللبس مرتين علشان برستيجها !!!!يا حبيبي على هيك برستيج وطبعا لازم تكون على سنجة عشرة من الميك اب للشنط للشوز(اعزكم الله)فيعني طول النهار ما الها شغلة ولا عملة الا انا رحت السوق انا جبت كزا انا رحت كزا وي سلاااااااااام!
طبعا كل هالمواضيع ما بتخلى من التعليقات على البنات التانيين،زي كانها هيا بس بتعرف تلبس والباقيين مش من مستواها الراقي!!!
الله يعين كل الناس على ما ابتلاهم وبس!

غالبا بتلاقي هادي البنت اللي بتلبس كل يومين لبسة ما بتوصل السوق الا مرة كل 30 سنة وكل لبسها من بنات عمها واخواتها واحتمال كمان من بتاخد من امها !!:P

كلمة أخيرة بكل هالمواضيع،الرقي والحضارة والتقدم ما بتنقاس بالشكل الخارجي والفلوس والفياعة الزايدة عن اللزوم،الرقي والعقل الواعي بيبينو من التصرفات والتعامل مع الناس بعدين (الدين المعاملة)،وعلمتني الدنيا ان البني ادم مش مفروض يفتخر باشي غلط بيعملو لأنو شايف من وجهة نظرو(الغلط طبعا)انو رح يكون محترم بعيون الناس لو عمل هادي الأشياء.ياما بنشوف بنات مش محجبات قمة الأخلاق والرقي في التعامل وياما بنشوف العكس!!!
ودمتم راقيين بأفعالكو واقوالكو ودينكو!

هناك 12 تعليقًا:

  1. Gawyaaaaaaaaaaaa ya salloooooooom :D 3sl ya nasoooo ... 7ketelee wlad 3ela w laj2een 2 b3rfsh shooo hay 7bethaa :D

    ردحذف
  2. سلوم طول عمرك بتفهمي
    انا اليوم لسا بموضوع العرسان مع صحباتي
    اكتر شي بكرهه بحياتي تيجي وحدة تحكيلي اجو والله خطبوني بس ما رضيت
    يا بنتي انتي ما بتفهمي انه بكرا بدك تروحي تخطبي لاخوكي وتخيلي وحدة خطبتوها قبل تروح تحكي للعروسة احو خطبوني بس ما رضيت
    يالله يا شكل اخوكي في هاي اللحظة كيف حايسير وشكلك كمان

    بالاخر اصحاب العقول في راحة

    ردحذف
  3. يا معصب انت
    بس معك حق بكل كلمة للاسف مجمتعنا هيك ناسنا هيك بشوفو الغلط وبعملوه والمصيبة بفكروه انو احسن شي

    ردحذف
  4. كلامك سليم مية في مية ..
    بس هاد الطبع انتشر في المجتمع وبدك كتييير لحتى يتغير ..
    الله بعين ..

    ويعطيكي العافية ..

    ريم

    ردحذف
  5. إنتي وصفتي كل أنواع البنات اللي بكرههم
    و عفكرة هدول موجودين بكل أنحاء العالم مش بس عندكم

    ردحذف
  6. اوه لالا
    البنت هادي بتاكل ساندوش فلافل كيف بيقدرو ياكلو هيك شغلات مكشوفة ومن برة,انا ما باكل غير اللي بتعمله ماما(على اساس انه امها اصلا بتعمله) ييييييه ياسلوم
    شو هتحكي لما تحكي عن البنااااات

    ردحذف
  7. الدنيا انقلب حالها يا عمه مثلا زمان كانوا البنات يتباهوا بشطارتهم في كل شيء دراستهم ونظافة بيوتهم وثقافتهم في كل المجالات سبحان الله الان كيف ؟

    مثال تاني زمان اي وحده كانت تشتري اشي تتباهى انه بكذا واخدته اقل الان صاروا يقولوا السعر مضروب في اثنين قبل ما تحكيلك من وين

    وكمان مثال البنت واهلها بيقولوا اتقد لبنتنا عريس راتبه كذا او عنده فلوس بالهبل وهذه مميزات العريس
    وبطل زمن بنشتري راجل

    حبيبتي ربنا يكملك بعقلك يا عمه

    ردحذف
  8. العقل زيــــنة .. و الدين نعمـــة .. و انا بنقهر و بكرة البنات كل يوم مليون الف مرة لهاي الاسباب اللي ذكرتيها جميعا !!

    ردحذف
  9. كلامك بيعجبني
    :D

    ردحذف
  10. والله يا عمدة هانم ..وحبيبة قلبي صدق الشاعر الي حكى..
    نعيب زماننا والعيب فينا..وما لزماننا عيب سوانا
    أنا معاكي بكل كلمة بتحكيها فعلا وصلنا لمرحلة قلبنا فيها أنفسنا لمصالح ما الها فائدة وما وصلنا لنتيجة إلا وصولنا كان لدمار انفسنا...والله يهدي الجميع يا حلوة انتي

    ردحذف
  11. حقيقة ليست بعيدة عن جنسنا
    بالفعل انظر الى من حولي لا اجد هموم جنسي الا بهذه القصص اين العقل اين الثقافة اين المعاملة الاحترام اللطف وووو .......
    مفقووود للاسف
    المصيبة انه هاي الاسباب بتخلينا نكره نفسنا اكثر لمجرد انه هما واحنا من نفس الجنس فالاساءة هي التى تقال عنا وليست المزايا ... فدائما اول ما يبدا الحديث عن شخص نبدا بمساؤه وننسى مزاياه ...

    اعاننا الله على تغيير ما بأنفسنا ليتغير مجتمعنا وبالتالي تتغير حياتنا جميعا الى الرقي والتحضر اللذان كانا في زمن حبيبنا محمد صلى الله وعليه وسلم

    دمتي بخير صديقتي

    ردحذف
  12. مسا الخير
    صراحة موضوع الثقافة الي غزت المجتمع عنا
    سواء البنات أو الشباب هو موضوع خطير كتير
    ومتل ما أنا شايف هو تم تنفيذه وترسيخه على المدى الطويل
    عبر برامج ومشاريع منظمة تهدف لتغير الثقافة عند فئات المجتمع .

    مثلاً المرأة عبر برامج توعية بالحرية وحقوق المرأة
    فأنقلب الموضوع إلى تحرر وليس حرية .

    واختلفت المفاهيم والقيم لدرجة أنوا أصبح عنا نماذج محرجة من البنات المتحررات الي بيشكلوا خطر اجتماعي كبير

    الموضوع اخطر من المتصور , واخطر من المتوقع
    وينعكس على كل المجتمع
    لانه المرأة هي نصف المجتمع وهي التي تربي النصف الثاني منه ,

    فبدلاً من أن تكون المراة مليئة بمفاهيم الأمومه والحب والعاطفة والروح الطيبة , أصبحت مليئة بالشوائب مثل أفكار التحرر والحرية والموضة وما إلى ذلك .

    مش معناه أنوا انا ضد المرأة بالعكس , أنا مع المرأة في حقوقها ولكن بحدود الأخلاق والدين والمعقول .

    لكِ أفضل تحية صديقتي ودمتِ بود

    ردحذف